الإدمان الذي أعنيه في عنوان الموضوع هو إدمان التسوق .. مدمنين التسوق يعرفهم موقع ويكيبيديا بانهم الأشخاص الذين يعتبرون أنفسهم مدمنين تسوق بحيث يشترون ما يحتاجونه ومالا يحتاجونه .. وبالكويتي .. يعني الناس اللي لصار عندهم فلوس لو دينار، ايدهم تحكهم وبالطول او بالعرض لازم يصرفون هالدينار ويشترون فيه لو حلاو من الجمعية :)
للأسف أغلب البنات مدمنات تسوق وللأسف الشديد الشباب صاروا ينافسونهم في هذا الإدمان.
مروا علي أشكال وأنواع من مدمني التسوق .. ناس عندهم فلوس وعندهم فيشترون بلا حساب .. ناس عندهم فلوس بس عندهم التزامات ثانية فيحاولون يضبطون الميزانية ويخصصون مبلغ شهري للتسوق .. ناس ما عندهم ويدخلون جمعيات شهرية علشان في النهاية توفر لها مبلغ محترم تقدر تشتريه فيه اللي تبي .. ناس ماعندهم شي ويتسلفون علشان يشترون ويصرفون.
وأغلب الناس في الكويت من النوع الثاني ولله الحمد والمنة .. عسى ربي يرزقنا شكر النعمة ويبعدنا عن البطر.
وعلى الرغم من هذا نلاقي وايد بنات مو عارفة شلون تتصرف ومو عارفة شلون تدير ميزانيتها وتوازن بين مصاريفها ونلاقي أن أغلب المراتب يروح على التسوق غير الضروري - يعني على الكماليات مو الأساسيات- وللأسف وايد بنات يشتكون أن الراتب يخلص قبل لا ينتهي الأسبوع الاول من الشهر .. حاولت أدور حل لهذه المشكلة بما أننا كلنا تقريبا نعاني من عدم الالتزام بالميزانية.
لقيت حل أو بالأحرى تجرب ناجحة لشخص في حل مشكلة إدمان التسوق .. خلينا نقول أن هذا الشخص اسمه (س) .. يقول في تجربته أن أول خطوة في حل هذه المشكلة هي أن نوقف وقفة مصارحة مع نفسي .. أحاول فيها أعرف وين مشكلتي .. وين الخلل في حياتي .. لأن المسألة مو بس مسألة مصروف .. لأ .. المسألة مسألة نمط حياة أو LifeStyle مثل ما يقولون .. وأي خلل في جزء ولو بسيط من الحياة راح يكون تأثير كبير.
أما ثاني خطوة بعد ما أحدد الخلل وأعرف شنو أكثر شي أصرف فلوسي عليه، أني أرسم لنفسي نمط حياة صحي نوعاً ما مثالي حتى لو ما التزمت فيه بالكامل. بالنسبة لي كانت اماكن الخلل كالتالي: المطاعم والمقاهي مع الأهل والأصحاب، شراء الملابس والاكسسوارات وأخيرا السفر خارج البلاد وهذا اللي كان يكسر لي الميزانية.
قعدت مع نفسي شوي وحطيت لي خطة نوعا ما كانت صعبة علي لكن مع الوقت تعلمت شلون اتأقلم معاها وشلون أستبدل الشغلات اللي حرمت نفسي منها بأخرى بدون أي أضرار مادية.
خطتي كانت كالتالي:
1. المطاعم: نهاية الأسبوع يوم للأهل وغالبا يكون غداء في البيت فأحدد مبلغ عشرين دينار اشتري فيه طبق حلو أو مالح للزوارة.
أما يوم الأصحاب فأحدد مبلغ ثلاثين دينار فقط للمطاعم والمقاهي وغيره - بالطول أول بالعرض أحاول اني ما أصرف غيرها.
2. الملابس: حددت لي مرتين في السنة فقط أشتري جميع احتياجاتي من الملابس والأحذية والأكسسوارات.
المرة الأولى في وقت نزول البضائع الصيفية/الربيعية ومنها اجهز لرمضان ولعيد الفطر وكم بدلة للمناسبات وكم بدلة للعمل وللبيت وكم بدلة كاجوال وطبعا للصيف ملابس للبحر والشاليهات وللسفر طبعا.
والمرة الثانية في وقت نزول البضايع الخريفية/الشتوية ومنها أجهز لعيد الأضحى وللمناسبات وللعمل والبيت وغيرها.
3. السفر: حددت السفر في فترة الصيف فقط، واستبدلت السفرات القصيرة نهاية الأسبوع أو في العطلات بإقامة في أحد فنادق الكويت مرة بالشهر فقط أو أحيانا بسبب ظروف العمل أخليها مرة كل شهرين. وفي هالفترة أغلق هاتفي النقال وأعيش جو إني فعلا خارج الكويت.
هاذي تجربة حلوة وناجحة وسهلة التطبيق طبعا بالنسبة للعزابية أما المتزوجين فهذول مسألة ثانية وقصة ثانية ويبيلهم كتب ومؤلفات في كيفية ضبط الميزانية.
وحدة من المعارف طبقت نصايح أخونا في الله (س) وضبطت معاها وصارت سنويا توفر 4000 دينار تزيد أو تنقص قليلاً
ويعطيها العافية سمحت لي أعرض كيفية تقسيم راتبها شهريا:
الراتب الأساسي بعد أقساط السيارة 780 دينار كويتي
بانزين سيارة : اشترت كرت تعبئة بقيمة 30 دينار
المطاعم : 80 دينار بحيث تصرف كل خميس 20 دينار إذا طلعت مع صديقاتي - ولما شفت نفسي مو قادرة أصرف أكثر من 20 دينار بالأسبوع على المطاعم بديت أدخل المطبخ وأفنتق بالوجبات المنزلية، ومع الوقت بدأ اكلي يصير صحي .
ملابس واكسسوارات : 100 دينار - تقول قمت كل ثلاث شهور أتسوق للملابس ومكملاتها بحيث يصير معاها 300 دينار
صالون وسبا : 70 دينار بحيث أقسمهم على مرتين في الشهر
هدايا أو مواجيب : أشيل 100 دينار حتى لو ما كان عندي عزايم أو مواجيب أحتفظ فيها لأن ساعات تصادفني أكثر من ست استقبالات في شهر واحد
شريت لي أظرف ملونة ووزعت فيها الفلوس بحيث حتى لو ما صرف كل الفلوس اللي فيه أخشهم للشهر الياي
مجموع المصاريف : 380 دينار
الباقي : 400
وعشان ما أصرف من ال400 فتحت لي حساب ثاني وسويت له استقطاع من حساب الراتب بمبلغ 400 دينار، فأول ما ينزل المعاش ينسحب منه هالمبلغ ويبقى لي بس ال 380 - للعلم ترى طبعا ساعات تمر ظروف اضطر إني أصرف من ال 400
المهم سنويا يتجمع عندي مبلغ 4800 - يزيد او ينقص - أخلي ال 4000 مكانها وأخذ ال 800 أسوي فيها أعمال خير - أضحية - صدقات - وقف خيري - عمرة - المهم إني أصرفهم في أعمال خير.
ولك الحمد يارب صار لي سنتين ونص على هذه الخطة وان شاء الله أكمل عليها.
ياريت اللي عنده تجربة ناجحة في مكافحة إدمان التسوق وصرف الفلوس يشاركنا فيها وخصوصا المتزوجين نبي تجارب ناجحة في إدارة ميزانية الأسرة.
